Саудискиот фудбалски гигант Ал-Хилал е подготвен да испрати понуда од 100 милиони евра за крилниот напаѓач на Барселона, Рафиња, објави каталонскиот весник „Спорт“.

Вклучен е четиригодишен договор вреден 200 милиони евра, што би го направило Бразилецот еден од најплатените фудбалери во светот.

Рафиња доживува вистински подем под водство на тренерот на Барса, Ханси Флик, кој успеа да го убеди да остане во клубот минатото лето, и покрај интересот за него од други тимови.

Оваа сезона, 27-годишниот офанзивен фудбалер учествуваше во 53 голови, со учинок од 30 погодоци и 23 асистенции во 40 официјални мечеви за Барса во сите натпреварувања.

И покрај финансиските искушенија од Блискиот Исток, Рафиња не изрази желба да ја напушти Барселона. Тој и неговото семејство претпочитаат да останат во Шпанија, каде што играчот конечно го реализира својот целосен потенцијал и се бори за големи трофеи со подмладениот каталонски состав.