Задоволни сме и убедени сме дека во иднина се повеќе колеги и членови на НСОН ќе се охрабрат да присуствуваат на вакви протести, велат од Независниот синдикат на образование и наука за „Слободен печат“, по протестот во саботата пред Министерството за образование и наука, каде просветните работници го искажаа своето незадоволство.

На протестот на кој присуствуваа повеќе наставници и професори од основни и средни училишта, присутните најмногу се жалеа на непочитување на колективните договори и законите, истакнувајќи дека просветните работници никогаш не земаат плата до 10-ти во месецот, како и тоа дека повеќето од нив чекаат со години за да се дефинира нивниот работен статус во училиштата.

Од НСОН ги повикаа на дијалог и претставниците на МОН, но како што велат засега немаат никаков одговор од таму, а нагласија и оти ако молкот продолжи, во тој случај ќе ги зголемат своите активности.

– Немаме добиено одговор од МОН. Претставниците на НСОН се секогаш подготвени да ги презентираат проблемите со кои се соочуваат просветните работници пред ресорното министерство. Доколку во иднина не постои желба за решавање на нашите барања, НСОН заедно со сите Независни синдикати при Конфедерацијата на синдикални организации на Македонија – КСОМ, има на план да превземе поголеми и побројни синдикални активности – додаваат од Синдикатот.