Во услови на пандемија од коронавирусот, Министерството за труд и социјална политика апелираше до родителите за повисока свест и подготвеност за договор за начинот на одржување на контактите на децата со родителот со кого не живеат, а со цел децата да не бидат изложени на опасностите кои со себе ги носи оваа пандемија.

– Донесените решенија на центрите за социјална работа со кои се регулира начинот на одржување на контактите на детето со родителот со кого не живее се во сила и истите се применувааат секогаш кога постојат услови за реализирање на видувањата, без да постои ризик за децата и на заедничка одговорност на двајцата родители – велат од Министерството.

Доколку на еден од родителите му е оневозможено да го гледа детето, под изговор од опасоста од коронавирусот, МТСП повикува родителот да се обрати во ЦСР.

– Согласно законот, родителите се должни да ги почитуваат решенијата на центрите за социјална работа  и нивното непочитување повлекува и одговорност за родителите. За надминување на недоразбирањата, родителите можат да се обратат во центрите за социјална работа кои ќе извршат проценка на ризикиот и на условите во конкретната ситуација и ќе го заштитат интересот на детето – посочуваат од министерството.

Непријатно искуство и неуспех да се постигне договор за гледање на сопственото дете има скопјанецот Васко Стојановски, кој откако започна вонредната состојба предизвикана од вирусот Ковид 19, си го нема видено осумгодишниот син. Дополнителна потешкотија според него е тоа што детето живеело со таткото шест години, и сега му е исклучително тешко што не може да го види.

– Откако почна пандемијава, не сум го видел син ми. Тешко ни е на двајцата, но јас не сум важен. Мене ми е тешко што детето страда. Тој е навикнат да биде со мене. Јас му бев старател шест години, а после и го доделија на мајката. Детето сака да дојде кај мене, да ме види, но мајка му ја користи ситуацијата со коронава и не дозволува. Со неа не можам да постигнам договор, таа воопшто не го пушта надвор да излезе. Три пати бев во центар за социјални работи, ми викаат поднесете жалба дека не ви го дава детето. Имам поднесено жалби до полициска станица Аеродром, до сега немам одговор – вели за Слободен печат Стојановски.

Од првата детска амбасада во светот, Меѓаши, велат дека во пракса тешко се спроведува споделеното заедничко родителство.

– За жал, во пракса тешко се спроведува споделеното заедничко родителство. МТСП препорачува родителите да се договорат за видувањата, а тоа во поголем број случаи тешко се регулира и во тој случај ЦСР издава решение со право за видување за време на викенди што во овие случаи и околности особено тешко се реализира. Фокусирани кон детето и неговите потреби да има подеднакво видување и со двата родители и по развод,  во делот на остварување на одговорното родителство, како организација сметаме дека не смееме да дозволиме како општество да бидеме соучесници во отуѓувањето на детето од страна на едниот родител кон другиот, што всушност негативно ќе се одрази на понатамошниот негов раст и развој. Со забраната за движење, се создава ситуација голем број родители да не можат да остварат никакво видување со своите деца со месеци, се додека трае вонредната ситуација. Со тоа, на околу 15 илјади деца директно им се нарушува едно од основните детски права – правото на контакт со двата родители. Долготрајното, неколкумесечно отсуство на контакт со едниот родител, особено во ситуација на домашна изолација, не може да донесе ништо добро за децата. Напротив, очекувано е да резултира со отуѓување од родителот со кого детето нема контакт, но и со цела низа негативни психолошки појави (гнев, лутина, депресија итн.) чии последици ќе останат и долго по укинувањето на вонредната состојба – велат од Меѓаши.

Резолуцијата на Советот на Европа е јасна, децата не смеат да се стават во втор план

„Интересите на децата честопати  се ставени во втор план. Споделената родителска одговорност значи дека родителите имаат права, обврски и одговорности во однос на своите деца. Инволвирањето на двајцата родители во одгледување на нивното дете е благопријатно за развојот на тоа дете. Разделбата на родителот од детето има непоправливи последици врз нивната врска. Една таква разделба треба да се наложи од страна на суд и тоа само во исклучителни околности кои предвидуваат тешки ризици за интересот на детето“, се вели во Резолуцијата на Советот на Европа.

Во услови на пандемија од коронавирусот, Министерството за труд и социјална политика апелираше до родителите за повисока свест и подготвеност за договор за начинот на одржување на контактите на децата со родителот со кого не живеат, а  со цел децата да не бидат изложени на опасностите кои со себе ги носи оваа пандемија.