Украинскиот претседател Володимир Зеленски одржа итна прес-конференција откако американскиот претседател рече дека на Украина ѝ требаат избори пред да потпише мировен договор и дека Украина можеше порано да ја прекине војната.

Украинскиот претседател Володимир Зеленски одговори на изјавите на Доналд Трамп.

„Никогаш не коментирам за рејтингот на популарноста, особено не за мојот или за оние на другите лидери“, рече Зеленски, но нагласи дека, според последната анкета, 58 отсто од Украинците му веруваат.

„Значи, ако некој сака да ме замени сега, нема да успее“, рече тој.

Тој, исто така, ја критикуваше „големата количина на дезинформации кои доаѓаат од Русија“, истакнувајќи дека оваа информација се шири и во САД.

„За жал, претседателот Трамп, со сета должна почит кон него како лидер на нација што ја почитуваме… живее во овој балон на дезинформации“, рече Зеленски.

Тој додаде дека ќе размисли за собирање повеќе податоци за довербата во клучните светски лидери за да се спротивстави на руските дезинформации.

Зеленски предупреди на „круг на дезинформации околу претседателот Трамп“, кој, како што рече, вклучува претставници поврзани со унгарската и словачката влада.

– Сето ова е загрижувачко. Сè што прават е со цел да ја ослабат Украина“, рече Зеленски.

Зеленски ги критикуваше американските претставници во Ријад што ја нарекоа руската инвазија на Украина „конфликт“ наместо војна која, како што потенцираше Путин, ја води против Украина.

Тој додаде дека сличен разговор имал и со претходната американска администрација, кога таа се „борела“ против официјален документ во кој војната е опишана како „конфликт“.

-Имаше обид да се смени политиката за да се омекнат термините што се користат за да се опише она што Путин го прави против нас. Ние се бориме за правата на Украина. Тоа во моментов не е најважно, но мора јасно да признаеме што се случува – рече Зеленски.

„САД ѝ помагаат на Русија да излезе од глобалната изолација“

Зеленски ги обвини Соединетите Американски Држави  дека „му помогнале на Путин да излезе од изолацијата“, што како што рече, беше „целосно оправдано воведена со нивната целосна инвазија на Украина“.

Тој, исто така, ја критикуваше изјавата на Доналд Трамп дека најголемиот дел од поддршката за Украина доаѓа од САД.

„Вистината е на друго место“, рече Зеленски, но додаде дека останува „благодарен за поддршката“ и сака „тимот на Трамп да ги има вистинските факти“.

Тој додаде дека Русија се обидува „да се претстави како жртва, што е нешто ново“.

Зеленски рече дека во последните денови „Украина испрати силна порака до Европа“ за време на состаноците со европските лидери и најави нови разговори, вклучително и посета на Велика Британија „во следните неколку недели“.

Тој посочи дека главна тема на разговорот е „што е подготвена Европа да направи за да ѝ помогне на Украина во случај на намалување на помошта од САД или други промени“, нагласувајќи дека Украина „мора да смета на единствената позиција на своите сојузници во Европа“.

Тој, исто така, ги коментираше неговите неодамнешни разговори со Обединетите Арапски Емирати и Турција, сугерирајќи дека Анкара потенцијално може да обезбеди безбедносни гаранции за Украина.