Ако има непринципиелен предлог од лидерот на ДУИ Али Ахмети, власта ќе се откаже од измени на Законот за локална самоуправа, брифира за „Слободен печат“ висок функционер на ВМРО-ДПМНЕ. На власта ѝ се неопходни гласови од опозицијата за да оствари двотретинско и Бадентерово мнозинство, кои се нужни за менување на овој системски закон.

Тоа, пак, ќе значи дека во Гостивар, Аеродром и во Сарај во ноември ќе има предвремени избори за градоначалници, зашто Тимчо Муцунски и Арбен Таравари в недела ќе ја сменат градоначалничката со министерска фотелја, а на Блерим Беџети веќе му е верификуван пратеничкиот мандат.
Законот нема да се смени и ако власта не се најде на иста линија со експертската фела. Дел од професорите веќе се изјаснија дека е неуставно Советот да избере вршител на должност градоначалник, ако актуелниот ја смени функцијата по истуркан повеќе од половина мандат. Дека правото на локална та самоуправа е уставно загарантирано право на граѓаните. Власта е подготвена да ги слушне ставовите и предлозите на експертите, но не е подготвена на концесии за нив.

Иако власта најавуваше усвојување на измените на законот уште пред формирањето на новата влада, мандатарот Христијан Мицкоски потврди дека ако обезбедат поддршка од опозицијата, предлогот ќе го поднесат дури по формирањето на владиниот кабинет.
Мицкоски со експертите ќе бара елегантен начин да се најде решение за законот, со цел да не се трошат непотребно пари на граѓаните, зашто доколку предлогот не помине, „за една година граѓаните на тие општини двапати ќе треба да излезат на избори“.

Со измените се предлага да нема предвремени локални избори, ако до завршувањето на мандатот на градоначалникот има помалку од две години и наместо вршител на должноста градоначалник со општината да раководи шест месеци, како што е според актуелниот закон, функцијата да ја врши речиси половина мандат.

Мицкоски лут на ставовите на дел експерти што се против ваквото законско решение, веќе изјави дека сака да ги слушне нивните ставови.

– Слушнавте дека има експерти што велат дека овој закон бил спротивен на Уставот. Јас би сакал да ги слушнам нивните мислења, тие мислења да ги вклучиме во овој закон, да не постои воопшто сомнеж во јавноста дека е можно овој закон да биде противуставен и веднаш кога ќе се создадат условите, тој да се најде во собраниска процедура – рече Мицкоски.

Тој ги повика експертите да кажат како треба да се направат измените на овој закон за да не биде спротивни на Уставот.

– Јас ги повикувам сите на разум, еве ги повикувам и експертите нека кажат, ако навистина мислат дека овој закон се коси со Уставот, нека кажат како треба да се направи за да не биде спротивен на Уставот и да го поминеме сите заедно во рамките на Парламентот, да не бидеме неодговорни кон паричниците на нашите граѓани. Ние треба да работиме за интересот на нашите граѓани. Ете, тоа е мојата порака – рече Мицкоски.

Дел од експертите, освен забелешката дека предлогот не е во согласност со Уставот, упатија критики дека ако се смени законот, тој сега ќе го реши проблемот со тројцата градоначалници кои ќе станат министри и пратеници, но дека е можна негова злоупотреба во иднина, како и тоа дека на тој начин се изневеруваат граѓаните кои ги гласале градоначалниците за полн мандат, а не функцијата да ја напуштат среде мандат.

– Можеби е во наш интерес да има избори и да потврдиме уште еднаш и да докажеме дека ВМРО-ДПМНЕ е убедливо најголемата политичка сила во Македонија. Но, зошто да трошиме милиони народни пари кога можеме тоа да го решиме на елегантен начин, бидејќи секако за неколку месеци од денеска доаѓаат редовни локални избори коишто ќе се случат во септември-октомври следната година, зошто повторно да ги мачиме граѓаните со гласање и да трошиме народни пари – рече Мицкоски.