Првото издание на инклузивниот фестивал „Ајде“ ќе се одржи на 4 септември со почеток во 18 часот во паркот „Васко Карангелески“ во Општина Аеродром. Фестивалот нуди богата програма за сечиј вкус, велат организаторите за „Слободен печат“.

– Преку богата урбана музичка и културна програма придонесуваме за збогатување на културната содржина на Општина Аеродром и Град Скопје. На сцената на „Ајде“ ќе настапат Диџеј Тина, Блек Хол Бенд, рокенрол-концерт на музичкото училиште „Мјузик лаб“, раперот и јутјубер Иван Ајнштајн, миленикот на младите Пајак и легендата на македонската рап-музика Диџеј Гоце САФ. Нашиот фестивал е инклузивен со хуманитарна димензија. Преку забава ќе собираме средства за да им се помогне на најзагрозените семејства на територијата на Аеродором – велат организаторите.

„Ајде“ има тенденција да прерасне и во платформа на вмрежување на домашните компании со локалното население, додаваат оттаму, за што предвидуваат штандови на кои граѓаните ќе можат да дојдат до информации за компаниите, како и за потенцијално вработување во истите.

Во рамките на фестивалот инклузијата е на пиедестал.

– На наша огромна чест и задоволство добиваме една бонус музичка точка во програмата, а тоа е познатата Пепелашка, Марија Савеска. Таа го посетува музичкото училиште на Андријана Јаневска, а долго членува и во балетското студио „Еурека“ со кое настапува на натпревари како во земјата, така и во странство. Учествувала во четири инклузивни претстави на „Еурека“ поставени на големата сцена во НОБ од кои во првата „Пепелашка“ ја танцуваше главната улога, преку која ѝ стана позната на пошироката јавност. Има освоени две златни интернационални медали во танц, заедно со инклузивната група на „Еурека“ денес настапува на натпревари и имаат освоено повеќе први места – велат од „Ајде“.

Фестивалот на посетителите ќе им понуди можност да погледнат изложба на младиот Филип Циглењак.

– Филип е дете од аутистичниот спектар, но веќе неколку години со голема љубов и страст слика и прави ремек-дела. Имал досега неколку изложби со висока посетеност па нашата радост е огромна што тој и неговото семејство се вклучија со оваа изложба на нашиот фестивал. Тој е дијамант – дете на нашите пријатели од здружението „Во мојот свет“ со кои ја подигнуваме свеста на околината за инклузија на лицата со попреченост и аутизам – појаснуваат организаторите.