При редовна контрола на товарно патничко возило на влез во Дебар, граничната полиција утврдила нелегален транспорт на животни без соодветна документација. При надзорот, ветеринар од Агенцијата за храна и ветеринарство (АХВ) констатирал дека се работи за превоз на 17 телиња на возраст од осум до десет месеци, со потекло од одгледувалишта во село Витолиште, општина Прилеп.

-Од страна на граничната полиција на Република Северна Македонија на влез на градот Дебар при редовна контрола на товарно патничко возило со скопски регистарски ознаки утврдено е дека се врши нелегален превоз/транспорт на животни без соодветни документи за движење на животните (искористени сертификати за движење на животните од истото одгледувалиште), со валидни пасоши за животните – се вели во соопштението од АХВ.

Животните се предадени на Агенцијата за одземен имот, а во текот на денешниот ден од страна на официјален ветеринар ќе биде постапено согласно надлежностите од Законот за ветеринарно здравство и Законот за идентификација и регистрација на животните.