Од Агенцијата за храна и ветеринарство информираат дека по добиена информација од медиумите дека во скопската Зоолошка градина угинале три животни од видот лами, спровеле вонреден инспекциски надзор по кој на Зоолошката градина изречена ѝ е парична казна од 650 евра во денарска противвредност бидејќи не пријавиле дека постои сомнеж дека дел од животните се болни од заразна болест.

Правното лице е казнето со 500 евра, додека пак одговорното лице е казнето со 150 евра бидејќи и покрај законската обврска, не пријавиле сомнеж на заразна болест на одгледувалиште.

– Дополнително, наредено и е да изврши дислоцирање и ставање во изолација на две лами кои биле затекнати на одгледувалиштето при надзорот и тоа на место во кое животните ќе немаат контакт со луѓе и ќе биде запазена нивната благосостојба. За две од угинатите животни лабораториски потврдено е дека угинале од заразна болест туберкулоза (зооноза) која може да се пренесе и е опасна и за луѓето – информираа од Агенцијата за храна и ветеринарство.

Оттаму додаваат дека се чека лабораториска потврда од извршениот патолошки преглед за причината за смрт на третото угинато животно.

Во скопската Зоолошка градина угинаа уште две лами од туберкулоза, тврди советникот Кирков