САД го поддржуваат придвижувањето на Северна Македонија кон Европската Унија и ги повикуваат сите избрани функционери што побрзо да ги направат неопходните измени што ќе го овозможат патот кон Унијата, порача американската амбасадорка Анџела Агелер, пренесувајќи го официјалниот став на Вашингтон.

На вчерашната заедничка прес-конференција со министерот за надворешни работи Бујар Османи, американската амбасадорка рече дека уставните измени се клучни за државата.

– Ова е важно прашање и примарно е важно за водството на Северна Македонија. САД го поддржува придвижувањето на земјата кон евроатлантската интеграција. Веруваме дека пристапувањето кон ЕУ е од клучно значење и ќе има големи придобивки за земјата. Ги поттикнуваме водството и избраните функционери да постапуваат во интерес на граѓаните, да постапуваат што е можно побрзо и да ги направат потребните измени што ќе го овозможат патот кон Унијата. Знаеме дека ова се тешки одлуки и дека граѓаните веќе донесоа многу тешки одлуки, но ние поддржуваме сѐ што ќе ви овозможи придвижување на тој пат – рече Агелер.

Со слична порака вчера се огласи и вицепремиерот за европски прашања Бојан Маричиќ. Во обраќањето пред Националниот совет за евроинтеграции во македонскиот парламент, на кој шведската амбасадорка Ами Ларсон Јаин ги претстави приоритетите на претседавањето на Шведска со Советот на ЕУ, Маричиќ рече дека сега е најважно сите заедно да останеме доследни на нашата стратегиска цел и да обезбедиме продолжување и континуитет на преговорите со ЕУ. Според него, има доволно време за завршување на уставните измени.

– Имаме доволно време и простор успешно да ги завршиме уставните измени, за задржување на динамиката на процесот на преговори и избегнување ново вето, овој пат од наш политички фактор, повторно чекање и ставање на државата во ќорсокак и неизвесност. Во следниот период нè чека интензивна трансформација на македонското општество. Очекувам сите да се на ниво на својата задача, а најмногу очекувам од институциите и од Собранието да преземат одговорност и да покажат проактивност, за брзо и темелно спроведување на европската реформска агенда и во 2030 Северна Македонија да ја внесеме во Европската Унија – изјави Маричиќ.

Американската амбасадорка Агелер, како особено важна, вчера ја спомена и борбата против корупцијата во контекст на утрешната посета на високиот советник во Стејт департментот Дерек Шоле и рече дека САД имаат план да ги реафирмираат заедничките приоритети како што е борбата против корупцијата. Тоа, според Агелер, ќе остане приоритет за Вашингтон и ќе покрене неколку прашања за време на посетата на Шоле.

Одговарајќи на новинарско прашање во врска со посетата на советникот, таа кажа дека ова биде ќе многу интензивна година, а, како што рече, советникот Шоле со неговата посета ќе ги потврди заложбите и поддршката на САД за Северна Македонија.

Во однос на прашањето за резултатите од истражувањето на американскиот тим што престојуваше во Скопје за да истражува корупција кај поранешни, но и кај актуелни функционери, министерот Османи рече дека во стратегиски дијалог со САД највидно место зазема заедничката соработка во делот во борбата против корупцијата.

– Тоа е во рамките на договорена платформа за соработка помеѓу САД и Република Северна Македонија и секоја нивна поддршка е добредојдена и сме благодарни за тоа. Минатата година ја дадоа веднаш по склучување на стратегискиот дијалог преку финансиска поддршка, дополнителни милиони евра за правосудството. Преку експертска помош, односно обука на луѓето што се вклучени во правосудството. Еве, најава и преку листа на санкции – рече Османи и додаде дека останува на САД да одлучат на каков начин ќе ја дадат таа поддршка.