„Нашите срца се скршени, благодарна сум на земјите од регионот за веднаш дадената помош“, изјави американската амбасадорка во земјава Анџела Агелер, по потпишувањето во Книгата на жалост поради трагедијата во Кочани во која животите ги загубија 59 млади луѓе, отворена во Министерството за надворешни работи и надворешна трговија.

„Нашето најдлабоко сочувство оди до жртвите и нивните најблиски во ова страшно време, а на повредените им посакуваме брзо закрепнување. Загубата на толку многу млади животи во една заедница е страшна трагедија. Понудив каква било помош и целосни ресурси на САД. Амбасада до премиерот, како и нашите молитви за сите оние кои страдаат денес“, рече Агелер.

„Благодарна што денеска дојдов овде со мојот пријател амбасадорот на ЕУ Михалис Рокас. Ние ја понудивме сета можна помош, но ние сме далеку и благодарна сум повеќе земји од регионот реагираа многу брзо и понудија помош, и презедоа дел од повредените и понудија помош што им беше потребна во моментот. Ние немавме можност тоа да го понудиме бидејќи сме далеку, и затоа сум многу благодарна на моите колеги и нивните земји што го сторија тоа“, додаде американската амбасадорка.

Претставникот на Светската здравствена организација (СЗО) во земјава Акиим Али, по потпишувањето во Книгата на жалост изрази сочувство до целата нација по повод трагичниот настан во Кочани, во кој животот го изгубија 59 лица, а 155 се повредени.

-Ова е навистина трагичен настан и во овој момент сè што можеме да направиме е да го изразиме нашето сочувство до целата нација, до заедниците и семејствата кои ги жалат оние кои ги изгубија, како и до оние кои се молат за брзо закрепнување на повредените пријатели и деца.

Тој додаде дека како Светска здравствена организација нудат поддршка на кој било начин што можат да ја дадат во овој момент, како и за понатамошните потреби, штом имаат појасна претстава.

-СЗО стоеше и стои на располагање за земјата брзо и ефикасно да ја добие потребната поддршка и грижа за луѓето на кои им е потребна, рече Али.