Аферата „Странски служби“ е првиот предмет од низата преостанати предмети кои ги доби Јавното обвинителство од поранешното СЈО. На 20.4.2021 година беше поднесен Обвинителен акт против едно лице, додека за второосомничениот истрагата е прекината поради недостапност. Предметот е во судска постапка и е закажано рочиште за 6.4.2022 година.

Следни на ред кои чекаат судска постапка се аферите „Пациент“, „Актор“, „Транспортер 2“, „Пропаганда“, „Дизајн“, „Подарок“, „Хармонија“, „Друмарина“, „Рентген“, „Продуцент“, „Лидери“, „Тарифа 2“, „Табала“ и „Базни станици“.

Предметот „Актор“ во кој се осомничени 11 физички и четири правни лица е во истражна постапка, се очекува постапувањето по побараната меѓународна правна помош од Грција. Вообичаено за постапките во кои се бара меѓународна правна помош изискуваат време за постапување, но во овој случај се неопходни, дотолку повеќе што во предметот поголемиот број од осомничените се странски државјани и странски правни лица, велат од ОЈО за „Слободен печат“.

Предметот „Пропаганда“ опфаќа девет осомничени лица сторители на повеќе кривични дела и истиот е во истражна постапка. Во текот на досегашното постапување е прибран обемен доказен материјал за кој во наредниот период ќе биде донесена наредба за вештачење, по вештачењето јавниот обвинител ќе донесе одлука за понатамошниот тек на постапката.

– Предметот „Дизајн“ опфаќа четири лица проотив кои е поднесен Обвинителен акт на 30.06.2021, а истиот е одобрен на 18.11.2021 година. Лицата се обвинети дека при спроведување на постапка за јавна набавка, како соизвршители ја искористиле својата службена положба и овластување и спротивно на Законот за јавни набавки, прибавиле корист за економскиот оператор од Р.Кина на начин што незаконски го фаворизирале и со него склучиле договор за набавка на 202 двокатни автобуси. Со извршените дејствија нанеле штета на Буџетот на РМ во износ од 293.773.226,00 денари или 4.772.920 евра. Во предметот „Подарок“ во кој се осомничени три лица за изградба на гасоводна делница Клечовце – Штип е побарана меѓународна правна помош и по истата се постапува. За предметот „Хармонија“ во кој беа осомничени три лица во 2020 година е донесена Наредба за запирање на истражната постапка бидејќи делата што им се ставаат на товар на осомничените не се кривични дела што се гонат по службена должност – велат од Јавното обвинителство.

Оттаму додаваат дека сите овие предмети се во надлежност на Основното јавно обвинителство за гонење на организиран криминал и коруција и се вообичаено обемни предмети што бараат време и посветеност. Воедно истражната и предистражната постапка подразбираат преземање на процесни дејствија не само од страна на обвинителот што постапува во предметот, туку и на други институции и лица со чија помош обвинителот обезбедува доволно цврсти докази што ќе ја поткрепат неговата јавнообвинителска одлука за понатамошниот тек на постапката. Во овој период екстензивноста на времетраењето на постапката, покрај другото е и како резултат на ограничувањата предизвикани од пандемијата, како и условите за работа на јавните обвинители кои постапуваат по предметите.