Американскиот продуцент и рапер Шон Комбс, познат како Диди, се извини што ја нападнал својата поранешна девојка Касандра Вентура, позната како Каси, откако се појави видео на кое се гледа како ја клоца и турка во фоајето на хотелот во 2016 година.

Раперот се извини на Инстаграм и рече дека ја презема целосната одговорност за „непростливите“ работи во видеото, кое „Си-ен-ен“ го емитуваше минатата недела.

„Бев згрозен кога го направив тоа. И сега ми се гади. Отидов и побарав стручна помош. Отидов на терапија и опоравување. Го молев Бога за милост. Многу ми е жал“, изјави Диди.

Тој додаде дека е „посветен да стане подобар човек со секој изминат ден“.

Меѓутоа, адвокатите на Каси изјавија за „Си-би-ес њуз“ дека изјавата на Диди „се однесува повеќе на него отколку на луѓето што ги повредил“.

„Кога Кеси и другите жени излегоа во јавноста со обвинувањата, тој негираше сè и инсинуираше дека неговите жртви само бараат начин да дојдат до пари“, рече адвокатката Мередит Фајертог.

„Фактот што беше принуден да се „извини“ само кога се докажа дека сите негови деманти се лажни, го покажува неговиот патетичен очај и нема никого да убеди со неговите неискрени зборови“, истакна адвокатот.

Објавената снимка од нападот се чини дека е компилација на снимки од безбедносните камери од 5 март 2016 година.

На него се гледа како Диди ја турка и соборува Вентура на подот, а потоа продолжува да ја клоца додека таа е на земја. Подоцна се обидел да ја одвлече во соба и фрлил предмет кон неа. Според „Си-ен-ен“, снимката била направена во сега затворениот хотел „Интерконтинентал“ во Лос Анџелес.