Рускиот олигарх Роман Абрамович ги изненади сите кога се појави на украинско-руските преговори во Истанбул, но според турската дипломатија, тој уште од првите денови „искрено“ се обидува да ја запре војната и неговиот придонес е „позитивен“, за што тој има валидни лични причини велат аналитичарите.

-Претседателот на фудбалскиот клуб Челзи учествува во напорите за „искрен мир“ од првите денови на руската инвазија на Украина на 24 февруари и неговиот придонес е „позитивен“, рече Мевлут Чавушоглу, турскиот министер за надворешни работи.

Абрамович е задолжен за „воспоставување контакти“ меѓу завојуваните страни, изјави портпаролот на Кремљ, Дмитриј Песков.

Волстрит џурнал открива дека Абрамович бил во Киев на почетокот на март каде се сретнал со украинскиот претседател Володимир Зеленски. Тогаш кај него беа откриени симптоми на труење, како кај двајца украински преговарачи, пишува Волстрит џурнал.

Руската инвазија на Украина му донесе лична катастрофа на олигархот Абрамович, велат аналитичарите, бидејќи тој, како и многу други руски олигарси, е погоден од западните санкции. Под санкции и замрзнати средства во Обединетото Кралство, Абрамович се обиде да го продаде Челзи, но продажбата беше прекината.

Милијардерот, чие богатство британската влада го проценува на 10,7 милијарди евра и нема толку чисто минато, како што напиша Би-Би-Си кога во средината на март ги откри документите кои го обвинуваат за корупција, па оттука тој има лични причини за завршување на војната во Украина што е можно поскоро.

Улогата на посредник треба да му помогне да си ја крене репутацијата пред западните влади кои го ставија на црната листа.

Учеството во преговорите „е добра можност за Абрамович да биде на вистинската страна на историјата“, вели Александар Баунов, научник од Московскиот центар Карнеги.

Баунов додава дека Абрамович најверојатно е заинтересиран да учествува во обновата на Украина по војната.

Освен во Челзи, Абрамович има акции во Евраз, гигант во челичната индустрија и во руската компанија Норилск Никел, специјализирана за експлоатација и преработка на никел и паладиум.

Рускиот олигарх „долго одржува блиски врски со Владимир Путин“, се вели во подготвителниот документ на Европската унија за нови санкции. Токму овие врски му овозможија да го зајакне своето богатство, се наведува во документот.

-Абрамович е „најлојалниот и најверен олигарх на Путин, тврди Марија Певчих, задолжена за истрага на фондацијата на опозицискиот руски политичар Алексеј Навални, кој се наоѓа во руски затвор.

Учеството на Абрамович во руско-украинските преговори е негова рекламна кампања, според Певчих.

„Најважно е Путин да му верува. Но, и Зеленски би можел да му верува“, изјави рускиот политиколог Константин Калачев.

Од 2001 до 2008 година, Роман Абрамович беше гувернер на ретко населената провинција Чукотка на далечниот североисток на Русија и ги инвестираше своите пари во проекти во тој неразвиен регион.

До 2019 година, кога го продаде својот удел, тој беше еден од директорите на првиот руски јавен канал, медиум кој го поддржува Путин.

Списанието Форбс проценува дека Абрамович изгубил 7 милијарди долари за време на војната во Украина, а неговото богатство сега е намалено на 8,3 милијарди.

Олигархот, за кој се шпекулира дека е повлечен и таинствен – тој никогаш не дава интервјуа – на 2 март објави дека сака да го продаде Челзи и дека приходите ќе ги плати на фондацијата „за сите жртви на војната во Украина и за долготрајните терминска реконструкција“.