Само неколку дена по триумфот во Лигата на шампионите, еуфоричниот сопственик на Челси, Роман Абрамович одлучи буџетот за засилувања во летниот преоден рок да изнесува 200 милиони фунти, или нешто повеќе од 230 милиони евра.
Иако пандемијата на коронавирусот им донесе големи загуби на многу екипи, Абрамович одлучи да не штеди, пишуваат англиските медиуми.

Сопственикот на својот тренер Томас Тухел му ветил дека ќе ја добие спомената сума за летниот преоден рок, и германскиот стратег веќе знае за кого ќе ги искористи парите, Ромелу Лукаку, Деклан Рајс и Адама Траоре.
Најголем дел од парите, нешто повеќе од половина (120 милиони евра) Тухел ќе мора да му исплати на Интер за да го врати Лукаку на „Стемфорд бриџ“.

Челси пред 10 години го купи Лукаку за 12 милиони евра од Андерлехт и потпиша петгодишен договор со напаѓачот кој одигра само 10 наптревари во синиот дрес, а останатиот период го помина на позајмица во ВБА и Евертон кој потоа го откупи неговиот договор.
Евертон потоа го продаде Лукаку на Манчестер јунајтед од каде во 2019 година се пресели во Интер. Белгискиот репрезентативец сезонава е најзаслужен што Интер ја освои титулата во Серија А, постигнувајќи 24 гола.

Деклан Рајс е уште еден фудбалер кој во минатото бил член на Челси, а сега Тухел сака да го врати на „Стемфорд бриџ“. Рајс беше дел од младинскиот тим на Челси до 2014 година кога се пресели во Вест Хем. Сега 22-годишениот фудбалер стана еден од најдобрите играчи во Премиер лигата и Тухел по секоја цена сака да го врати назад, но тоа ќе го чини повеќе од 60 милиони евра.
Последната желба на Германецот е Адама Траоре кој е продукт на младинската академија на Барселона од каде пред пет години дојде во Премиер лигата. Прво играше во Астон Вила, па во Мидлсброу, а сега е член на Вулверхемптон кој за неговите услуги ќе бара најмалку 60 милиони евра.