Со повик од градоначалникот на Хирошима за укинување на нуклеарното оружје, Јапонија денеска ја одбележа 78-годишнината од американското атомско бомбардирање на Хирошима.

Мировното ѕвоно заѕвони во осум часот и 15 минути, во исто време кога беше фрлена и бомбата, а околу 50.000 учесници на церемонијата, вклучително и преживеаните, одадоа почит на жртвите со едноминутен молк.

– Лидерите ширум светот мора да се соочат со реалноста, дека нуклеарните закани за кои сега се залагаат одредени законодавци ја откриваат глупоста на теоријата за нуклеарно заплашување, истакна градоначалникот на Хирошима, Казуми Мацуи.

Јапонскиот премиер Фумио Кишида, пак, кажа дека патот кон свет без нуклеарно оружје станува сè пострмен, делумно поради руските нуклеарни закани, но оти поважно да се врати меѓународната волја за постигнување на таа цел.

– Светските лидери го посетија овој град, ги видоа неговите споменици, разговараа со неговите храбри преживеани жители, а потоа се охрабрија да се залагаат за нуклеарно разоружување. Тоа треба да го сторат повеќе, бидејќи тапаните на нуклеарната војна повторно чукаат, посочи генералниот секретар на Обединетите нации, Антонио Гутереш.

Бомбата фрлена врз Хирошима на 6 август, наречена Мало момче (Little boy), веднаш уби 80.000 луѓе, а до крајот на годината уште околу 70.000. Бомбата со име Дебел човек (Fat man) беше фрлена во Нагасаки на 9 август, при што веднаш загинаа 22.000 луѓе, а уште 39.000 починаа од последици од радијацијата. Јапонија се предаде на 15 август 1945 година.