Македонската амбасада во Тирана попладнево објави известување околу обновувањето на патните исправи на Македонците во Албанија кои поседуваат македонско државјанство.

-Ги информираме сите припадници на македонското национално малцинство во Република Албанија, кои имаат македонско државјанство и поседуваат истечени пасоши, дека до 20 овој месец може да поднесат барање за нивно обновување во Амбасадата на Република Северна Македонија во Тирана, пишува во известувањето.

Заинтересираните кои сакаат да ги обноват своите македонски пасоши треба да се пријават на телефонскиот број: +355 422 30909 или на Е-пошта: [email protected].

„При поднесување на пријавата, задолжително е да се достават документ за идентификација, Документ со кој се потврдува македонското државјанство (важечки документ или уверение за државјанство) и да се наведе контакт телефонски број или електронска адреса на барателот“, велат од амбасадата додавајќи дека фотографирањето за нови пасоши ќе биде во Амбасадата во Тирана и во Општина Пустец, што е по избор на барателот.