Наместо класичен начин на подготовка на лазањи, експериментирајте со вкусовите, а наместо мелено месо, за овој рецепт користете свеж спанаќ, пармезан и домати пелати. Исто така, ако не сте љубител на традиционалните лазањи направени од брашно и јајца, се употребуваат и лазањи со зелена боја што се направени со додавање спанаќ.

Состојки:

– кори за лазањи
– 400 г спанаќ
– 250 г пелати домати
– 3 лажици маслиново масло
– 200 г путер
– 150 г брашно
– 150 мл млеко
– 6 лажици пармезан
– 5 јајца
– сол по вкус
– мускантно оревче
– 1 лажица мешан зачин
– масло за готвење

Подготовка:

Пелатите убаво исцедете ги, извадете им ги семките, исечкајте ги и ставете ги во загреано маслиново масло. Пржете ги додека не испари течноста. Спанаќот исчистете го, измијте го и кратко варете го во зовриена солена вода. Потоа извадете го, изладете го и исечкајте го.

Брашното пропржете го на путер, додајте го млекото и гответе околу 5 минути, непрекинато мешајќи со жица. Додајте го мускантното оревче, посолете и бешамелот е готов.

Кога бешамелот ќе се излади, во него додајте ги сечканиот спанаќ, мешаниот зачин и јајцата, кои претходно ќе ги изматите.
Сварете ги корите за лазањи, но не докрај, исцедете ги и изладете ги. Земете тава, намачкајте ја со масло за готвење и наредете ред од корите за лазањи. Потоа, ставете прво од сосот од пелати, па од бешамелот со спанаќ и одозгора повторно ставете ред со кори.

Постапката повторете ја додека не ги потрошите корите, а на крајот одозгора сипете го остатокот од бешамелот и пармезанот. Печете на загреана рерна на 180 степени Целзиусови, околу 40 минути.
Добар апетит!