Време е за средба меѓу владите на Бугарија и Република Северна Македонија, порача денеска потпретседателката на Бугарија Илијана Јотова во Варна. Таа побара да се преземат посериозни мерки по последниот инцидент со граѓанин со бугарски идентитет.

Доставувањето нота до македонскиот амбасадор таа го оцени како недоволна акција, бидејќи има информации дека се подготвува текст за промена на уставот на Северна Македонија, но во пракса нема никаков развој.

Потпретседателката Јотова повика да не се заборави дека покрај Уставот на РС Македонија треба да има измени и според потпишаните заеднички протоколи, кои зборуваат за промени во учебниците, оценување на историските датуми и личности и за отворање на досиеја, но, вели, ништо од ова не е направено.

– Не се осмелувам ни да помислам дека новата бугарска влада ќе отстапи од веќе воспоставената бугарска позиција, која не е само на официјалниот кабинет, туку и на претседателската институција и на Народното собрание. Не смеам ни да помислам дека ќе има чекор назад. Ако Бугарија со новото министерство за надворешни работи и со новата влада ја преиспита својата позиција во смисла сега да ги почнеме преговорите и работите ќе се регулираат сами по себе, бидејќи, патем, се слушаат не еден или два такви „совети“, ова значи национално предавство – рече потпретседателката на Бугарија Јотова.

Министерот за надворешни работи Бујар Османи денеска на Преспа форумот рече дека очекува наскоро билатерална средба со колешката Марија Габриел или во Скопје или во Софија.
Во Билатералниот протокол што лани во јуни го потпишаа Македонија и Бугарија се предвидени повеќе обрски за двете држави, при што еден сет од обврските треба да се изврши пред, а друг после уставните измени, кои се услов да се отворат поглавјата од преговорите на Македонија за членство во ЕУ.