Најмалку 104 лица загинаа во поплави во село во близина на брегот на езерото Тангањика во источниот дел на Демократска Република Конго, соопштија денес тамошните власти. „Повеќето од починатите се деца и постари лица“, соопштија властите, додавајќи дека 80 лица се повредени, додека 150 куќи се уништени.

Поплавите се честа појава во ДР Конго, особено на бреговите на Големите езера на истокот од земјата, опкружени со ридови ослабени од уништувањето на шумите.

Во 2023 година, поплавите одзедоа 400 животи во неколку градови на бреговите на езерото Киву, во покраината Јужен Киву.

Според Канцеларијата на ОН за координација на хуманитарни прашања, околу 6,9 милиони луѓе во Западна и Централна Африка се погодени од поројни дождови и силни поплави во 2024 година.

ДР Конго, огромна земја со екваторска клима и една од најсиромашните во светот, е особено ранлива на овие климатски феномени, поради неконтролираната урбанизација и недостатокот на инфраструктура во градовите и селата.

Глобалното затоплување е исто така фактор, според експертите, кои веруваат дека екстремните временски настани ќе станат почести на континентот.

До 2030 година, дури 118 милиони многу сиромашни Африканци (со приходи помали од два долари дневно) ќе бидат изложени на суша, поплави и екстремна топлина.