Анџела Алварез (96) е американска пејачка со кубанско потекло и најстарата добитничка на наградата Латино Греми во категоријата најдобар нов изведувач.

Пред три години го издаде својот деби албум кој ја доведе до номинација за престижна музичка награда.

Таа освои Греми во 2022 година и го подели со Силвана Естрада. Анџела почнала да настапува дури на постара возраст и е доказ дека никогаш не е доцна во животот да го следиш својот сон или да започнеш ново хоби.

Алварез имала страст за музика уште од детството.

„Кога бев дете имав две тетки кои свиреа на клавир и ме научија да пеам. Секогаш кога имаше семеен собир, јас бев уметникот. Ми правеа фустани, а јас секогаш сакав да настапувам“, се сеќава таа.

Сепак, и покрај нејзината желба да стане пејачка, нејзиниот татко ја одвратил да се занимава со музика. Анџела потоа се омажила и имала четири деца. Сепак, таа не ја запоставила музиката. Таа пишувала песни и настапувала за семејството и пријателите.

Нејзиниот пат до успехот во музичката индустрија бил полн со пречки, дури и по емигрирањето во САД.

Благодарение на нејзиниот внук Карлос Хозе Алварез, кој верувал во нејзиниот талент и ѝ го организирал снимањето на албумот, песните на Анџела конечно ја виделе светлината на денот. Таа изјавила дека нејзината цел била „да го зачува наследството на нејзиното семејство“ и не очекувала голем меѓународен успех.

Во својот говор кога ја освои Греми наградата, таа рече дека е многу горда што може да ја раскаже својата приказна и да допре до луѓето.

„Има луѓе кои се откажуваат, но јас не се откажав. Секогаш се борев“, рече таа.

Таа ѝ оддаде почит на својата татковина и им се заблагодари на најблиските. Таа им порача на сите кои се обидуваат да си го исполнат сонот да не се откажуваат од него.

„Ви ветувам, никогаш не е доцна“, заклучила таа.