Дваесет и пет годишната актерка Мајки Медисон минатиот викенд постигна неверојатен успех – доби Оскар за најдобра женска улога за филмот „Анора“. Покрај тоа што ја освои златната статуетка, на големо се коментираше и нејзината одлука да не користи координатор за интимни сцени за време на снимањето на филмот.

Зошто го одбила координаторот за интимни сцени?

Во филмот, Анора Медисон ја игра Ани, сексуална работничка која добива шанса за живот од бајките кога ќе се омажи со синот на руски олигарх. Но, кога родителите на младоженецот дознаваат за врската, пристигнуваат во Њујорк за да го спречат бракот. Филмот е полн со експлицитни сцени, а многу критичари истакнаа дека присуството на координатор за интимни сцени било неопходно, не само поради секс сцените туку и поради сложената врска помеѓу нејзиниот лик и темата на филмот.

Медисон, сепак, свесно ја отфрлила таа опција. Во интервју за „Actors on Actors“, кога разговараше со Памела Андерсон, таа ја објасни својата одлука.

„Тоа беше моја одлука. Режисерот и екипата ми понудија координатор за интимните сцени, но Марк Ејделштајн, кој го игра Иван, и јас решивме дека е најдобро да биде едноставно“, изјавила Медисон. Таа истакна дека знаела што сакал да постигне режисерот Шон Бејкер и дека верувала во неговата визија.

„Мојот лик е сексуална работничка, а и претходно сум ги гледала филмовите на Шон и знам колку му е важна автентичноста. Бев подготвена за тоа. Како актерка на тие сцени пристапував одговорно“, додала таа.

Деветти најмлад добитник на Оскар во историјата

Иако оваа одлука предизвика различни реакции, тие не ја спречија Медисон да ја освои најпрестижната филмска награда. Филмот „Анора“ беше големиот победник на вечерта, а покрај наградата за најдобра женска улога, доби и Оскар за најдобра монтажа, оригинално сценарио, режија и најдобар филм.

Во својот емотивен говор Медисон ја истакна важноста на заедницата на сексуалните работници и им ја посвети својата победа.

„Сакам да ја признаам и да ја почитувам заедницата на сексуалните работници. Ќе продолжам да ги поддржувам и да бидам нивен сојузник. Сите неверојатни жени кои имав можност да ги запознаам додека го снимав овој филм го направија ова искуство уште поспецијално“, рече таа.

Оваа победа ја направи деветтата најмлада победничка во таа категорија во историјата и најмладата оскаровка во последните 12 години, откако Џенифер Лоренс го освои Оскарот за „Silver Linings Playbook“ на 22-годишна возраст.