Светот сè повеќе го прифаќа трендот на изнајмување облека наместо купување. Потрошувачите одлучуваат да го направат овој чекор не само од модни причини, туку и од практични и еколошки причини. Додека порано гардеробери беа полни со парчиња што би се носеле само неколку пати, денес сè поголем број луѓе избираат да позајмуваат облека за посебни пригоди, но и за секојдневно носење. Според „Тајмс оф Индија“, овој тренд бележи значителен раст во последните години, особено кај помладите генерации кои се свесни за еколошките предизвици и сакаат да ја намалат прекумерната потрошувачка- пренесе Каматица.

Покрај тоа, растечките цени на луксузните брендови и глобалната економска неизвесност дополнително ги мотивираат потрошувачите да бараат алтернативни решенија.

Платформите за изнајмување нудат широк избор: од вечерни фустани и деловни костуми до секојдневна гардероба и модни додатоци. Идејата е едноставна – плаќајте само за она што го носите и кога ви е потребно. На овој начин, се намалува акумулацијата на облека во плакарите, а во исто време, се дава можност за експериментирање со различни стилови без големи инвестиции. За многумина, ова е и начин да бидат во тек со најновите трендови, без да трошат илјадници евра на парчиња што излегуваат од мода по само една сезона. Еколошкиот аспект е исто така силен мотив бидејќи, според Обединетите нации, модната индустрија е одговорна за околу 10% од глобалните емисии на јаглерод диоксид, па затоа изнајмувањето се смета за дел од решението.

Овој тренд не го прифатија само поединци. Сè повеќе компании влегуваат во секторот за изнајмување облека, нудејќи бизнис модели слични на оние на Netflix – претплатете се и менувајте ја вашата гардероба кога сакате. Овој концепт е веќе популарен во Соединетите Американски Држави, а сега се шири во Азија и Европа.