„Жолтите комбиња“ се повеќе мит отколку реалност, а можноста да постојат парасистеми за прислушување во станови е еквивалентна на можноста во станови во Скопје да се прави операција на отворено срце или да се пресадува срце, рече директорот на Оперативно-техничката агенција (ОТА), Зоран Ангеловски, вечерва во интервју за „360 степени“ на ТВ „Алсат“.

ОТА е институцијата во која, по распуштањето на УБК, се пресели опремата за следење на комуникациите, а таа треба да ги оневозможи злоупотребите во следењето на електронските комуникации на граѓаните од страна на овластените органи за следење на комуникациите или операторите.

Според Ангеловски, приказните за „жолти комбиња“ со кои се прислушкува се веројатно производ на фасцинацијата на јавноста со сите случувања во минатото и смета дека ова ќе биде вечна тема за која ќе се зборува постојано, но уверува дека „во моментов такви комбиња во Македонија не постојат“.

„Тој тип на опрема е многу тешко да се набави, прилично е скапа. Второ, подразбира учество на голем број на лица во целиот процес. Не може да претпоставиме дека еден човек или двајца со комбето ќе можат да направат некаков пристап до системи и да следат. Се работи за т.н оперативна акција во која учествуваат повеќе чинители, повеќе оперативци, аналитичари и репродуцери“, вели Ангеловски.

Директорот додава дека бројот на лица кои би биле инволвирани во една таква операција е прилично голем, дека воопшто не е едноставна за организација и дека со себе носи големи ризици.

Прашан за тоа дали постојат парасистеми во станови во Скопје од каде може да се следат комуникациите, тој вели дека неовластеното следење од трети лица е речиси невозможно, бидејќи технологијата за пристап до оператор е софистицирана.

„Тоа е исто како сега да пуштиме приказна дека во стан во Скопје се прави операција на отворено срце или се пресадува срце. Прво, се работи за многу специфична материја за која мал број инженери, вклучително и во операторите, знаат како се изведува тоа. Тоа се специјализирани компании кои го конфиргурираат пристапот во операторот и го контролираат“, рече Ангеловски.

Тој не одговори директно дали освен сигналот од телефонот од операторот, ОТА може да обезбеди следење на комуникациите на интернет преку Вајбер, Ватсап, Сигнал и слични апликации, но рече дека законска обврска на ОТА е да обезбеди следење на комуникации согласно законот, што подразбира следење на секаков тип електронски комуникации.