Млада првородка од Кочани која поради ризици во бременоста била препоратена на скопската Гинеколошко-акушерска клиника се породи прва на новогодишната ноќ. Минута по полноќ таа на свет со царски рез донесе здраво машко бебе, а по неа се родени уште три, две женски и уште едно машко бебе, информираше директорката на ГАК д-р Викторија Јовановска.

22-годишната Стојанка Панајотова од кочанското село Соколарци е мајката која роди здраво машко дете,  тешко 3720 грама и е долго 51 сантиметар.

-Ние ги посетивме и мајката и бебето. Среќни сме дека годината ја започнуваме со здраво машко дете и се надевам така здраво ќе ни помине целата година., рече министерот Беким Сали и им посака успешна година на сите граѓани.

Тој посебно им се заблагодари на здравствени работници во државата кои изминатиот период, како што рече дадоа се од себе за да профункционира здравствениот систем.

-Се надевам дека така и ќе продолжиме, најпрвин чувајќи го личното здравје, а потоа и давајќи придонес за заштита на здравјето на сите граѓани во државата и оваа година да ја поминеме така, рече министерот Сали.

-Како министерство за труд и социјална политика ја продолжуваме традицијата и на првороденото дете во Македонија му подаруваме златник. И оваа година ни се роди здраво машко дете, им честитаме на среќните родители на кои им е прва рожба. Им посакуваме многу здравје, живо и здраво да им е детето и само радости да им носи, изјави Тренчевска.

Таа порача дека во фокус на МТСП останува да биде детската заштита и овозможување на секое  дете пристап до квалитетно предучилишно образование и воспитание.

-И во 2023 продолжуваме со изградба на нови градинки и проширување на капацитетите за да може секое дете во државата да има пристап до предучилишно образование имајќи во предвид дека вклучувањето во предучилишното образование навистина влијае многу во растот и развојот на секое дете, изјави Тренчевска.