Жена од Алабама која го изгубила бебето откако била застрелана во стомак, е обвинета за убиство на своето неродено бебе, јавуваат американските медиуми.

Маршеј Џонс била во петтиот месец од бременоста кога била застрелана од друга жена пред продавница во Плезнт Гроув во декември. Дваесет и седумгодишната Џонс сега е обвинета за убиство според новиот строг закон против абортус и ќе биде задржана во притвор со кауција од 50.000 долари, додека жената која пукала во неа е ослободена.

„Истрагата покажа дека единствената вистинска жртва во овој случај е нероденото бебе. Токму мајката на бебето ја почнала и продолжила тепачката, што резултирала со смрт на нејзиното неродено бебе“, изјави Дени Рид од полициската станица во Плезнт Гроув.

Инаку Алабама неодамна го донесе еден од најстрогите закони против абортус во цела Америка. Според тоа, многумина овој случај го гледаат како нов напад врз жените.

Гувернерот на Алабама Кеј Ајви, во мај потпиша закон кој забранува абортус во речиси сите околности, вклучувајќи силување и инцест. Алабама е една од 38-те сојузни држави која признава убиство на фетус.