Блокадата на железничкиот сообраќај во Црна Гора продолжи и во понеделник откако 85 кондуктери и диспечери на возови ја прекинаа работата пред три дена, барајќи зголемување на платите преку измени на Колективниот договор, пренесува Радио телевизија Црна Гора.

Сообраќајот на линијата Белград-Бар и во правец на Никшиќ е прекинат. Преговорите меѓу раководството на Железничката инфраструктура и вработените за зголемување на платите завршија без договор во понеделник.

Според извршната директорка на државната компанија, Марина Бошковиќ, работниците го отфрлија просечното зголемување на платата од околу 300 евра.

„Ги повикувам оние кои сакаат да ја прифатат оваа понуда, да го потпишат договорот и да се вратат на работа, за да не станат несвесни соучесници во планираната саботажа против државата“, рече Бошковиќ.

Во исто време, таа ги повика обвинителството и полицијата да „се вклучат и да ја завршат работата во рамките на нивната надлежност“ со цел да се деблокира железничкиот сообраќај во Црна Гора.

Претставникот на работниците Андреј Калуѓеровиќ тврди дека работниците кои штрајкуваат не добиле писмени гаранции од раководството за зголемување на платите и дека блокадата продолжува.

Пред штрајкот, тие тврдеа дека нивното постоење е загрозено со плати од околу 700 до 800 евра со ноќна работа и 35 години работен стаж, што е пониско од националниот просек.

Според Заводот за статистика, просечната плата во Црна Гора во јули била околу 1.010 евра. Бошковиќ рече дека компанијата ќе бара работници и во странство за да воспостави сообраќај.

Железничката инфраструктура, со 800 вработени, е дел од државната компанија „Железница Црне Гора“. Оваа компанија е поделена на неколку компании, Железнички транспорт, Железничка инфраструктура, Одржување на железнички возен парк и „Монтекарго“.