Жан Тод, еден од ретките кој има привилегија да го посети седумкратниот Формула 1 шампион Михаел Шумахер, открива дека работите значително се промениле по несреќата, пренесува „Индепендент“.

Се ближи десетгодишнината од страшната несреќа на Михаел Шумахер, како и цела деценија откако никој во јавноста не го видел легендарниот Ф1 шампион. За состојбата на Германецот се шпекулира многу, сите би сакале да ја слушнат ексклузива, но само неколку пријатели навистина имаат можност да го видат Шумахер од тој морничав ден на скијање на Алпите во 2013 година. Па дури и тие што го виделе, имаат договор да не зборуваат за тоа…

Еден од оние кои повремено дава информации за медиумите е Жан Тод, поранешниот шеф на Михаел Шумахер во „Ферари“, но и семеен пријател кој бил покрај него во најдобрите и најтешките моменти од неговата кариера.

Сега за францускиот весник „Л’Екип“ со само неколку зборови откри што се случува со познатиот Формула 1 возач, но како и обично обидувајќи се да не открива премногу детали за својот пријател кој моментално има 54 години и живее во неговата вила во Швајцарија.

– Повеќе не е истиот Михаел на кој сме навикнати. Тој е поразличен, но неговата сопруга и децата одлично се грижат за него. Тие го штитат. Неговиот живот сега е поинаков, но јас ја имам привилегијата да споделувам моменти со него. Повеќе нема што да се каже на таа тема. За жал, тоа му се случи пред 10 години и тој повеќе не е Михаел што го знаевме од Формула 1 – рече Жан Тод.

Шумахер е еден од најдобрите спортисти на сите времиња, а на 29 декември 2013 година при скијање на Алпите падна на глава и удри во карпа. Веднаш беше префрлен во болница каде што беше опериран, а поради опасноста во која се наоѓаше – беше ставен во индуцирана кома. Потоа беше префрлен на домашно лекување во Лозана, каде за него се грижи семејството.