Здружението на земјоделци на Федерацијата на Босна и Херцеговина денес апелираше до сите нивоа на власт итно да прогласат состојба на природна катастрофа „поради алармантната состојба во земјоделството“.

Како што пренесува Н1 телевизија, долгиот период без дожд веќе зема данок врз земјоделското производство.

Земјоделците наведуваат дека се евидентираат загуби и во растителното и во животинското производство, што значително ќе влијае на понатамошното производство и, во голема мера, на опстанокот на домашното земјоделско производство.

Претседателот на Здружението, Неџад Биќо, изјави дека загубите се најизразени кога станува збор за пченка, зеленчук и овошје, а дека недостатокот на систем за наводнување дополнително ја влошува ситуацијата.

Тој нагласи дека производството во вакви услови сериозно ќе страда, а временската прогноза за наредниот период, кога станува збор за земјоделството, воопшто не е добра и дека не се очекуваат врнежи.

Биќо рече дека евентуалните врнежи би можеле да помогнат за обновување на дел од родот, но дека би морало да има пообилни дождови што би врнеле неколку дена, што не се очекува во следниот месец.