Европската комисија соопшти дека 18 земји-членки поднеле барање за заеми во вкупна вредност од 127 милијарди евра преку инструментот SAFE, креиран за зајакнување на заедничките одбранбени капацитети на Европската унија, пишува „Еуњуз“.

SAFE, клучен дел од стратегијата на ЕУ за зголемување на колективната безбедност, овозможува поволно финансирање за земјите-членки во контекст на зголемените геополитички тензии и перцепираната закана од Русија. Инструментот има за цел да ја намали зависноста од САД во набавката на воена опрема.

Меѓу земјите кои поднеле барање за средства се Франција, Шпанија, Италија и Полска.

SAFE е дел од поширок план презентиран од Европската комисија на крајот од март, со кој се предвидува мобилизација на до 800 милијарди евра за модернизација и дополнително вооружување на европските земји.