Украинскиот претседател Володимир Зеленски денес изјави дека војната меѓу Русија и Украина не е само вооружен конфликт, туку битка на различни погледи на светот, додавајќи дека сите Украинци се молат за траен мир.

„Ова дефинитивно е повеќе од вооружен конфликт, повеќе од агресија на една држава против друга, тоа е војна на светски погледи, војна на фундаментални феномени. Токму на нашата земја денес се води битката на доброто и злото, светлината и темнината. Украинците го знаат тоа“, рече Зеленски на Националниот молитвен појадок, годишен настан што ги собира политичарите од различни партии, бизнисмените, дипломатите и свештенството, пренесува Укринформ.

Зеленски истакна дека зборовите на поддршка од меѓународните партнери значат дека земјата не е сама „во борбата против злото“.

Според него, целиот свет имал можност да види што е способен рускиот претседател Владимир Путин, а тоа, како што рече Зеленски, вклучува убивање цивили, киднапирање деца, мачење затвореници, масовни гробници и палење болници и училишта.

Зеленски рече дека „битката меѓу доброто и злото“ сè уште трае и дека руските напади мора да бидат запрени.

„Верувам дека сите можеме да го постигнеме ова заедно. Ќе постигнеме мир што ќе биде стабилен и траен. Сите се молиме за тоа денес. И тие сигурно ќе бидат слушнати!“ Тие денес се слушаат на стотици различни јазици и од наши пријатели од различни духовни заедници, од различни континенти“, нагласи Зеленски.