Украинскиот претседател Володимир Зеленски денес објави дека се надева дека 19-тиот пакет санкции на Европската Унија ќе ја погоди силно Русија и ќе ја натера да ги почувствува последиците од своите постапки, како и дека ќе претставува доволна контрамерка што ќе ја принуди да склучи мир.

Во објава на Фејсбук, Зеленски нагласи дека Русија мора да ги почувствува последиците од она што го прави и дека е потребен соодветен отпор за да се наметне мир.

„Ова може да се постигне со доволна сила на нашата армија, нашите долгорочни капацитети и благодарение на силните санкции и притисок врз Русија“, рече тој, објави Укринформ.

Според извештаите, Украина сега се брани од руски напади речиси секојдневно, а оваа недела се регистрирани над 1.500 напади со беспилотни летала, како и напади со повеќе од 1.280 воздушни бомби и 50 ракети од различни видови.

„Сето ова има за цел тероризирање на нашата нација. Доколку Русија не биде запрена, таа дефинитивно ќе стане закана за земјите од Европа и регионот на Пацификот. Силните санкции се алатка што ќе ни помогне да ја запреме. Треба да ги блокираме сите можни патишта за снабдување, руското заобиколување на санкциите, како и да извршиме притисок врз земјите и поединечните компании што им помагаат“, предупреди Зеленски.

Тој додаде дека Украина очекува 19-тиот пакет санкции на ЕУ да биде навистина болен и дека САД ќе им се придружат на Европејците во овој поглед.

Во петокот, Европската комисија усвои нов, 19-ти по ред, пакет санкции против Русија, потсети Укринформ.