Украинскиот претседател Володимир Зеленски денес изјави дека разговорите меѓу партнерите на Украина за безбедносните гаранции за таа земја, по завршувањето на војната со Русија, треба „итно“ да се подигнат на ниво на лидери на земјите.

Зеленски, исто така, на прес-конференција во Киев рече дека сака сојузниците да ги ратификуваат сите такви гаранции во парламентите на своите земји, пренесува Ројтерс.

Со интензивирањето на дипломатските напори за завршување на војната со Русија, претставниците на Украина постојано нагласуваат дека трајниот мир е можен само со веродостојни и применливи безбедносни гаранции за Украина, а не само со симболични ветувања или договори на хартија.