Украинскиот претседател Володимир Зеленски денес објави дека ќе го покани американскиот претседател Доналд Трамп да воведе санкции врз Русија, кога ќе се сретнат следната недела во седиштето на Обединетите нации во Њујорк, и апелираше до сојузниците на Украина да „престанат да губат време“.

Зеленски на прес-конференција во својата канцеларија во Киев изјави дека очекува воведување дополнителни санкции врз Русија, доколку претседателот на земјата Владимир Путин одбие да се сретне со него или да се договори за прекин на огнот, објави денес Гардијан- пренесе Политика.

„Ако војната продолжи и нема напредок кон мирот, очекуваме санкции“, рече Зеленски.

Трамп постојано се закануваше дека ќе преземе мерки против Русија, а минатата недела рече дека Соединетите Американски Држави се подготвени да „воведат големи санкции“ врз Русија, но само откако сите земји од НАТО ќе се согласат да престанат да купуваат нафта од Русија и да воведат царини врз Кина.

Коментирајќи ја моменталната ситуација во врска со воведувањето нови санкции врз Русија, Зеленски рече дека „поврзувањето“ на можните санкции на САД со барањата европските земји да дејствуваат први значи „забавување на притисокот врз Путин“.

„Претседателот Трамп очекува силна акција од Европа. Мислам дека губиме многу време ако не се воведат санкции или не се преземат некои чекори, што е токму она што го очекуваме од него (Трамп)“, рече Зеленски.

Зеленски рече дека сака „цела Европа“ да воведе санкции врз Русија и дека Трамп би можел да ги „охрабри“ европските земји да сторат повеќе, додавајќи дека проруската влада на Словачка веројатно ќе одговори на притисокот од САД.

„Сите гледаат кон Соединетите Американски Држави“, рече тој.

Украинскиот претседател ја повтори својата подготвеност да се сретне со Путин во кој било формат, или сам или на состанок на кој ќе присуствува американскиот претседател.

Тој рече дека за време на претстојната посета на Њујорк ќе побара појаснување за тоа какви безбедносни гаранции се подготвени да обезбедат САД како дел од мировниот договор.

Зеленски, исто така, рече дека неговата сопруга Олена „најверојатно“ ќе се сретне со Меланија Трамп во Њујорк и дека таа ќе разговара за враќањето на украинските деца киднапирани од Русија.

Тој оцени дека кризата со горивото во Русија, која доведе до долги редици за бензин во некои делови од земјата, ќе се влоши, истакнувајќи дека Киев го намалува јазот со Москва во производството на беспилотни летала, но дека на Украина ѝ се потребни повеќе пари за финансирање на домашното производство на оружје.