Украинскиот претседател Володимир Зеленски изрази незадоволство што Русија, како што рече, сè уште не се соочила со „остра реакција од светските лидери“ за своите постапки.

„Има повеќе од доволно изјави, но сè уште нема доволно акции. Русите ги тестираат границите на можното. Тие ја тестираат реакцијата. Тие внимателно следат како функционираат вооружените сили на НАТО, што можат да направат и што не можат да направат сè уште“, напиша Зеленски на Телеграм.

Тој потсети дека во Белорусија започнаа заеднички воени вежби со Русија, оценувајќи дека тие би можеле да бидат дел од „план за подготовка“. Сепак, не прецизираше на што точно мислеше.

Еден ден претходно, украинскиот претседател ја обвини Москва за нарушување на полскиот воздушен простор, нарекувајќи го тоа „ново ниво на ескалација“ и „исклучително опасен преседан за Европа“.

Според него, ова е „уште една рунда на ескалација“ во која руските објекти дејствувале во „воздушниот простор на НАТО“.