Поранешниот украински министер за надворешни работи Дмитро Кулеба денес изјави дека никогаш не помислил дека ќе мора да ја напушти својата земја преку ноќ „како крадец“ и дека сега е во Краков, Полска.

Тој ја напушти Украина само неколку часа пред да стапи во сила декретот со кој им се забранува на поранешните дипломати и функционери да ја напуштат Украина, а Кулеба во телефонски разговор со италијанскиот весник „Кориере дела Сера“ изјави дека навреме дознал за декретот и дека успеал да ја напушти земјата неколку часа пред да стапи во сила.

Како што рече, декретот не бил донесен поради фактот што од почетокот на војната, вонредната состојба им забранувала на мажите на воена возраст под 60 години да ја напуштат земјата, но од други причини.

„Во Украина, поранешните дипломати не се обврзани да служат во војска. Точно е дека (претседателот на Украина Володимир) Зеленски и неговата придружба не сакаат да одиме во странство и да кажуваме работи за кои веруваат дека би можеле да бидат спротивни на ставовите на владата. Пресметав дека околу дваесетмина од нас се опфатени со оваа мерка. Не мислам дека страдам од манија за прогон, но сигурно знам дека целта на декретот е да ме блокира мене и уште неколку други луѓе“, рече Кулеба, кој од 2020 година до минатата година беше шеф на украинската дипломатија кога Зеленски одеднаш го смени од функцијата .

Тој додава дека за него забраната за напуштање на Украина е голема загуба, бидејќи заработува пари од предавања во странство – во Париз и Соединетите Американски Држави, каде што често патува на конференции.

„Мојата плата зависи од странски извори. И во секој случај, генерално имам тенденција да ја бранам нашата влада. Но, во одредени кругови во коридорите на моќта, сè уште преовладува стариот советски менталитет, според кој ако одите во странство како слободен граѓанин, автоматски станувате агент кој кова заговор против државата“, рече тој.

Тој исто така рече дека е ставен на „црната листа“ затоа што јавно ја осудил намерата на Зеленски да цензурира две владини комисии задолжени за истражување на корупцијата.

„И ова е сериозен проблем. Граѓанското општество намерно одлучи да ги ограничи критиките со цел да поттикне единство во име на воените напори. Но, Зеленски сега нема право да го злоупотребува ова за да го замолчи кој било глас освен својот“, рече Кулеба.