Германскиот министер за внатрешни работи, Хорст Зехофер, вчера предупреди на нов голем бегалски и миграциски бран кон Европа во време кога илјадници бегалци од Авганистан и Блискиот Исток се обидуваат илегално да влезат преку источната граница на ЕУ со Белорусија, јави Анадолија.

-Пред два дена, за првпат по многу години, имавме повеќе од 1.000 имигранти дневно. Ако го помножите тоа со бројот на денови во еден месец, ќе сфатите дека има итна потреба да се дејствува, изјави Зехофер за „Билд ТВ” .

Тој повика на усвојување заедничка миграциска стратегија на ЕУ за справување со растечката бегалска и мигрантска криза.

-Решението на миграцискиот проблем ќе биде остварливо само преку ЕУ, рече германскиот министер.

Германија ги засили граничните патроли со Полска, распоредувајќи 800 полицајци за да ги спречи мигрантите да влезат во ЕУ од Белорусија, соопшти Министерството за внатрешни работи.

Со недели наназад луѓе од Ирак, Сирија, Иран и Авганистан, наводно, доаѓаат во Германија од Полска, во која влегле од Белорусија, и успеале да стигнат до територијата на ЕУ.

Турската агенција посочува дека Германија се уште се бори со последиците од политиката на отворени врати од 2015 година, кога дозволи во земјата да влезат стотици илјади бегалци и мигранти.