Основно правно начело, согласно домашните и меѓународните правни стандарди, е да не се коментира неправосилна судска одлука, сѐ со цел да не се влијае на понатамошната судска постапка и одлучување на повисок степен, велат од Здружението на судии по јавните прозивки од премиерот Христијан Мицкоски и од ВМРО-ДПМНЕ, а во врска со пресудата за лекарката Мери Пешевскаво случајот „Онкологија“, објави А1 он.

„Затоа, и во овој случај, иако како судство сме прозвани за донесената неправосилна пресуда за предметот познат како „ Онкологија“ – донесена врз основа на признание на вина, Здружението на судии на РСМ, ќе ги почитува правните стандарди и нема да даде свој коментар. По однос ‘вечната тема’ за платите на судиите во земјава, Здружението на судии јавно ќе ги обелодени фактите кои се проверливи и достапни за јавноста, а тоа е дека платите на најголем број судии во Основните судови во РСМ, со фамозното ‘зголемување’ од 78 отсто, достигнува до 86.000 денари, а примањата на судските службеници се исклучително ниски и под просечната плата во РСМ. Ваквите плати на судиите и, секако, судските службеници, се апсолутно најниските во регионот и пошироко“, се вели во реакцијата од Здружението на судии.

„Обвинителството сѐ уште не ја добило пресудата“

Признанието на вина и осудителната пресуда изречена за една од обвинетите во предметот “Онкологија” е потврда за основаноста на наводите во обвинението поднесено од Основното јавно обвинителство Скопје, велат од Јавното обвинителство откако беше отворена дебата за пресудата во случајот која ја вознемири и разбранува јавноста.

„Висината на санкцијата за стореното кривично дело ја одредува Судот, а Обвинителството сѐ уште не ги добило пресудата и образложението за изречената казна. По приемот, Јавното обвинителство ќе донесе одлука дали ќе вложи жалба во однос на висината на санкцијата“, велат од ОЈО.

Кривичен суд ги упатува новинарите кај Судскиот совет

Рекација има и од Кривичен суд од каде што медиумите и новинарите за сите прашања ги упатуваат кај Судскиот совет.

„По повод медиумските прашањата во однос на изјавите поврзани со неправосилната судска одлука К бр. 1069/25, односно пресудата за раздвоената постапка по повод признание на вина во предметот во јавноста познат како „Онкологија“, Кривичениот суд Скопје ја известува јавноста дека со зголемено внимание ги следи јавните реакции. За сите одговори, срдечно ги упатуваме медиумите да се обратат до Судскиот совет на Република Северна Македонија кој е надлежен да ја обезбедува и гарантира самостојноста и независноста на судската власт, преку остварување на своите функции“, стои во соопштението на Судот.

Кривичниот суд вчера ѝ изрече двегодишна условна казна на Пешевска, која претходно го призна делото за несовесно лекување, со што не ѝ беше изречена забрана за работа доколку во следните пет години не стори ново кривично дело.

Таа беше обвинета заедно со поранешниот директор на Клиниката за онкологија, Никола Васев, и уште двајца лекари, под сомнение за „тешки дела против здравјето на луѓето“ и „несовесно лекување“, откако кај 29 пациенти биле применети неподобни терапии со отстапувања во дозирањето и без соодветна проценка на нивната здравствена состојба.