Од Здружението на судии сметаат дека секое неаргументирано интервенирање во третата власт може да влијае на авторитетот и интегритетот на судството. „Слободен печат“ го праша Здружението на судии за став во врска со најавите на претседателот на ВМРО-ДПМНЕ и иден премиер Христијан Мицкоски дека нивен приоритет е распуштање на Судскиот совет и на Советот на јавни обвинители, како и длабока реформа на правосудството.

– Во врска со прашањето за Судскиот совет сметаме дека е најупатно да ги поставите на членовите на Советот. Неспорен факт е дека извршната власт има право да креира политики во правец на реформирање и унапредување на судскиот систем со цел фукционирање на правната држава и почитување на човековите права, додека Законодавната власт има надлежност преку законски измени и решенија да овозможува нивна реализација. Сепак, како Здружение на судии на РСМ напоменуваме дека судската власт е независна и една од трите власти во системот, па во таа смисла секое неаргументирано интервенирање без претходна длабока анализа и инволиврање на сите чинители на третата власт може да влијае тому врз авоторитетот и интегритетот на судството, што е спротивно  на сите досегашни извештаи и препораки од меѓународната организација – одговорија од Здружението на судии.

Претходно, Судскиот совет на прашање на „Слободен печат“ се изјасни дека судската власт како една од трите власти е самостојна и независна и секое мешање на кој било од носителите на другите две власти носи со себе сериозна опасност за едно демократско општество, правната сигурност и владеењето на правото како вредности.

– Само тогаш кога политичарите кои доаѓаат и си заминуваат од власт ќе сфатат дека судската власт е столбот кој останува и не е марионета, ниту инструмент за остварување на нечии интереси, граѓаните ќе добијат судство какво што заслужуваат – одговорија од Судскиот совет.

Мицкоски вчера повтори дека нивна цел е да го распуштат Судскиот совет, како и Советот на јавни обвинители.

– Главен предизвик ќе бидат реформите во Судски совет и Советот за јавни обвинители. Наша цел е да ги распуштиме овие кои довербата во правниот систем ја сведоа на едноцифрена бројка проценти, и наместо нив, самите судии и обвинители да си ги изберат своите претставници преку тајно гласање – рече Мицкоски.