Ставањето на „црната листа“ на САД на било кој судија е сериозен удар за честа и угледот на конкретниот функционер на судската власт, реагира Здружението на судии откако судијата од Апелациониот суд, Енвер Беџети заедно со поранешниот вицепремиер, Артан Груби се најде американската „црна листа“ заради земање мито за да се застари случајот со масовното прислушување каде првообвинет беше поранешниот директор на УБК, Сашо Мијалков.

-Имајќи го предвид значењето на етичкото однесување и интегритет на судиите кое треба да биде неприкосновено и во согласност, пред се со Уставот и Законите на нашата земја, но и согласно Меѓународните Закони и препораките на Европската унија и Соединетите Американски, држави како наши стратешки партнери, Здружението повикува на брзо разрешување на случајот, пред се заради зачувување на независноста и интегритетот на судската фела во земјата, велат од Здружението.

Судијата Беџети стана познат во јавноста откако поранешната претседателка на Судски совет, Весна Дамева јавно кажа дека поради барањето одговорност и неунапредувањето на судијата и беше извршен „пуч“ и беше сменета од претседателското место.

Сепак Судскиот совет утврди дека Беџети, како судија известител, со месеци го чувал предметот „Таргет-тврдина“ во фиока. Официјално предметот „Таргет“ кој се однесува на масовното прислушување застаре поради скандалозните измени на Кривичниот законик, но Беџети претходно девет месеци го чувал во фиока, па хипотетички постоела можност тој да биде завршен пред изгласувањето на измените.

И покрај ова, Судскиот совет му изрече само дисциплинска мерка и шест месеци добиваше 20 отсто помала плата. Потоа се кандидираше и за Врховен судија, но не беше унапреден.