Родителите да ги вакцинираат децата со МРП вакцина против мали сипаници, рубеола и заушки, за да се заштитат најмалите од заболувања, апелираат здравствените власти во пресрет на Европската недела за имунизација. Редовната вакцинација е клучна особено за новороденчињата и децата од предучилишна возраст. Во 2020 година имало исклучително низок опфат со МРП вакцината, односно 63 проценти за првата доза и 68 проценти за втората доза на национално ниво. Тогаш во некои општини невакцинирани останале половината од децата. Меѓутоа, во 2021 година овој опфат се зголемил, па во 2021 година со прва доза МРП вакцина опфатени биле 70.4 проценти од децата, а за втора доза 80 проценти. МРП вакцината бележи најнизок опфат споредено со сите други вакцини па затоа фокусот е на неа во Европската недела за имунизација.

– Сакаме да постигнеме опфат од 95 проценти и затоа во соработка со Државниот здравствен инспекторат почнуваме со активности за повикување на пропуштените деца за вакцинација. Со кампањата предвидено е на родителите што ја пропуштиле вакцинацијата на нивните деца, да им се испраќаат СМС пораки, рече министерот за здравство Беким Сали.

Тој апелираше да не се дозволи нова епидемија на заразни болести поради пропуштање на вакцини од задолжителниот календар за имунизација. Овие вакцини се достапни за секое дете и се клучни за заштита на детското здравје. Рестриктивни мерки нема да има, иако вакцинацијата е задолжителна за секое дете за да се запише во градинка. Како една од причините поради кои има отпор против МРП вакцината според министерот се дезинформациите кои нашироко се демантирани и апелираше граѓаните да не стануваат нивен плен туку да им веруваат на официјални институции.

Министерството за здравство уверува дека вакцините се од светски реномирани производители кои задолжително исполнуваат строги критериуми за квалитет, регистрирани се од Агенцијата за лекови и медицински средства и имаат сертификат за квалитет и од производителот и од референтната лабораторија за контрола на квалитетот.

Претставничката на УНИЦЕФ, Патриција Ди Џовани вели дека вакцините за само 60 секунди спасуваат пет животи и повеќе од два века штитат од болести.

– Земјава имаше висока стапка за вакцинација кај децата, ама колебливоста од инфодемијата ја намалија таа стапка. Не е доволно што во 2021 година има подобрување во споредба со 2020 година. Најалармантно е со вакцината против рубеола, заушки и мали сипаници за деца на возраст од 12 месеци. Во 2018 година во земјава имаше епидемија на мали сипаници и имаше 4 смртни случаи на деца, сите беа невакцинирани, рече Ди Џовани.

Таа додаде дека ниската стапка на вакцинација со МРП вакцина, остава простор за страв, дека е можна нова епидемија која не смее да се чека да се случи туку треба да се спречи. Малите сипаници се се една од најсериозните респираторни болести. Од нив може да дојде до тешки компликации кај детето како оток на мозокот, хоспитализација и смрт и особено се опасни за помали деца од 5 години.

– Нема научна поткрепеност дека вакцинирањето и аутизмот се поврзани и УНИЦЕФ потроши многу пари да откријат дали има таква поврзаност ама ја нема, уверува Ди Џовани.

Таа апелираше во 21 век родителите да не ги загрозуваат свесно животите на децата и да не ги изложуваат на болести за кои има високоефективни вакцини.