Платите на здравствените работници овој месец ќе се зголемат за десет проценти согласно коефициентите, а веќе следната година во март ќе има зголемување од пет проценти.

Ова беше најавено по состанокот на двата репрезентативни синдикати на здравствените работници во Македонија и премиерот Христијан Мицкоски.

– Веќе следната година во март месец ќе имаме дополнителни 5 проценти зголемување на паричната маса која се издвојува за плати за здравствените работници, следната година 2026 од 5 до 7 проценти, во зависност од тоа во каква состојба и кондиција ќе биде Буџетот, да се надеваме дека ќе биде навистина во здрава кондиција, а работиме на тоа – најави Мицкоски.

Истото тоа зголемување од 5 до 7 процени на паричната маса, тој најави дека ќе се оствари и во 2027 година, а од 7 до 10 проценти ќе биде во 2028 година.

– Или кога ќе го земете целиот овој период во низа добиваме зголемување на паричната маса потреба за да се исплатат платите на здравствените работници за целиот период помеѓу 40 и 50 проценти. Навистина нешто коешто претставува историско и јас очекувам дека во текот на следните денови, повторно и од Министерството за здравство и од Фондот ќе излезат со нови позитивни пораки за здравствените работници и со тоа го заокружуваме тој циклус – додаде Мицкоски по средбата со синдикатите.