Поранешниот прв човек на Динамо Загреб, Здравко Мамиќ, повторно е во фокусот на балканската фудбалска јавност. Како што пренесува босанскиот портал „СОП“, Мамиќ е сериозен кандидат за преземање на управувањето со ФК Сараево, еден од најголемите клубови во Босна и Херцеговина.

Според информациите, првичните разговори со актуелниот сопственик Исмир Мирвиќ веќе се во тек, и засега сè се одвива во позитивна насока. Се шпекулира дека Мамиќ планира да ја завземе челната позиција во клубот пред почетокот на летните подготовки.

Со своето искуство и деловна умешност, Мамиќ е познат по тоа што го претвори Динамо Загреб во регионален гигант, клубот  во неговиот период бележеше успеси во Европа, а низ неговите раце поминаа бројни таленти кои беа продадени за милионски суми. Таа формула сега би можел да ја примени и во Сараево.

Неофицијално, се дознава и дека Мамиќ има намера веднаш да ја започне реконструкцијата на младинската школа, сегмент што често беше клучен за неговиот модел на долгорочен успех.