Од Град Скопје информираат дека денеска е официјално завршена реконструкцијата на улица „808“ во населбата Автокоманда и по неколку години од нејзиното етапно обновување е повторно пуштена во целосна употреба.

-На оваа фреквентна сообраќајница на потег од крстосницата со улица 16та Македонска Бригада до крстосницата со булеварот Киро Глигоров, покрај новата водоводна и канализациона мрежа, реконструкцијата опфати обнова на коловозот на површина од 9.200 квадратни метри, а дополнително се изведоа и соодветно пешачка и велосипедска патека од двете страни. Градежните работи на улица 808 ги изведе јавното претпријатие Улици и патишта Скопје- информира градоначалничката на Град Скопје, Данела Арсовска.

Имено, „Слободен печат“ неколку пати пишуваше за оваа улица долга скоро еден километар, која е навистина фреквентна и на неа дневно минуваат илјадници автомобили и тешки товарни возила, но сепак нејзината реконструкција неколку пати наиде на подолги паузи помеѓу фазите на обнова и беше подзаборавена од  Градот.

Со месеци „ѕиркаат“ испакнати шахти на недовршената улица 808 во Автокоманда

Арсовска додаде дека освен новиот асфалт, исто така била целосно реконструирана водоводната мрежа и канализацијата.

-Во првата фаза по подготвителните градежни работи, целосно се реконструираше водоводната мрежа и останата хидротехничка опрема, а со цел комплетна обнова на мрежата во овој дел на градот. Воедно се изврши реконструкција на атмосферската канализација, како и замена на нефункционалните сливници со што во иднина се превенираат поплави на овој потег- соопшти градоначалничката.