Матурантите кои не ја положија државната матура во јуни денеска ќе го полагаат првиот, задолжителен екстерен испит – мајчин јазик и литература, додека пак за два дена, на 14 август е полагањето на вториот изборен екстерен испит од државната матура.

Според податоците на Државниот испитен центар (ДИЦ), за двата испитни дена вкупно се пријавени 1118 ученици, а тестот по мајчин јазик денеска ќе го полагаат 352 ученици на македонски јазик, 225 на албански јазик и девет кандидати на турски јазик.

За полагањето на 14 август се пријавени 779 ученици за англиски јазик, еден ученик ќе полага француски јазик, двајца ќе полагаат германски, 27 избрале математика и еден матурант е пријавен да го полага испитот по естетика.

Според видот на образование, од гимназиско ќе полагаат 265 ученици, од стручните средни училишта полагаат 835 ученици и пријавени се 18 матуранти од средно уметничко образование. Испитите во августовскиот рок кандидатите ќе ги полагаат во простории на факултетите.

Просечната оценка на успехот од полагањето на двата екстерни испита во јунската сесија е 3.69 и е повисок од минатата година кога средната оценка беше 3.26. Поголем успех е забележан кај мајчините јазици и кај други предмети, а особено по математика за кој средната оценка е 4.14.