Кула Рубик, новата икона на градскиот пејзаж. Зградата со мешовита употреба се наоѓа во Општина Карпош, на улица Никола Русински 1А. Зградата го поврзува булевар 8 Септември и булевар Партизански Одреди. Во непосредна близина на зградата се: Клиника Жан Митрев, Градска болница 8-ми Септември, Поликлиника Букурешт, градинки, основни училишта. Локацијата на зградата ви нуди директна поврзаност со сè што е потребно за да живеете модерен живот.

Ова е објавата на градежната компанија „ЗСФ Ком“ на Фејсбук, преку која инвеститорот на 17-катницата која започна да се гради зад бензиската на „Макпетрол“ во Карпош, на заинтересираните граѓани им нуди на продажба станови.

Како што е познато, спорната зграда се гради во заштитено подрачје на споменикот Воена болница и пред две недели Конзерваторски центар го поништи конзерваторското мислење кое е задолжителен документ за добивање градежна дозвола.

Конзерваторски центар го поништи позитивното мислење за кулата во Карпош, на потег е Општината

Оттогаш до денеска од Општина Карпош нема одговор дали ќе биде поништена градежната дозвола, дали ќе се бара ново конзерваторско мислење и дали веќе е поднесена жалба на решението на Конзерваторски центар.

Зградата и понатаму непречено се гради и покрај реакциите и протестите на граѓаните и граѓанските организации. Започна и продажбата на становите во неа. Секој понатамошен потег се чини ќе биде сериозно задоцнет и сериозно ќе се одрази на општинската каса.