Предлог-законот за правична застапеност помина на Влада, информира премиерот Христијан Мицкоски и порача дека Владата е посветена на унапредување на добрите меѓуетнички односи. Како што веќе објавивме, личната карта и другите лични документи ќе бидат клучни да се спречи злоупотребата на етничката припадност при вработување во државните институции. Премиерот потврди дека предлог-законот прво ќе биде испратен за мислење во Венецијанската комисија и дека потоа ќе влезе во собраниска процедура.

– Наша обврска е да градиме институции кои не делат, туку обединуваат. Законот има јасна цел – администрацијата да биде вистински сервис на сите граѓани изградена врз заслуги, знаење професионалност и интегритет – рече Мицкоски.

Тој рече дека силна и стручна администрација не е прашашање на етничка припадност. Дека законот е гаранција дека етничките заедници ќе бидат соодветно и правично застапени во институциите, но истовремено ќе го штити квалитетите на сите етнички заедници и дека ова е закон кој стимулира и ќе дава шанса запазувајќи го квалитетот.
Премиерот потврди дека припадноста на заедницата ќе се утврдува со лична карта, односно со личен документ.

-Логично е дека секој кој ќе аплицира ќе мора да докаже кој е, и во законот е предвидено тоа да биде со лична карта  или документ кој го идентификува тоа лице. Методологијата дополнително ќе биде изработена откако ќе се формира координативното тело кое ќе го надѕира спроведувањето на законот – рече Мицкоски.

За критиките од ДУИ дека предлог-законот е штетен за Албанците, премиерот рече дека целта на ДУИ е да поларизира.

-Не мислам дека целта на ДУИ е да зборува за суштината, туку да се против и етнички да ги поларизираат работите. За разлика од нив кои носеа вештачки импланти и понижуваа, овој закон го работевме за да биде во согласност со Уставот. ДУИ во извештај вели дека балансерот е исцрпен и сега тие истите се против самите себе. Целта  на ДУИ е јасна – колку може повеќе етнички да се поларизира – реле Мицкоски.

За првиот вицепремиер Изет Меџити, предлог законот за соодветна и правична застапеност претставува историски момент бидејќи првпат правичната застапеност која е уставна категорија добива законско решение.

-Предлог-законот гарантира еднаков пристап при вработувањата во јавната и во државната администрација, правична застапеност на сите заедници во институциите, но и вработувањата да се вршат врз основа на заслуги и квалификации на секој поединец- рече Меџити.

За министерот за јавна администрација Горан Минчев битно е дека со законот за правична застапеност вработувањата ќе бидат врз база на компенетност, квалитет и професионаност. Тој нистакна дека правичната застапеност ќе се регулира со подзаконски акти откако ќе се добие мислењето од Венецијанската комисија.

– Овој закон за правична застапеност којшто морам да кажам дека е уставна категогија која произлегува од Охридскиот рамковен договор, го подготви група на експерти во Владата. Законот денеска ќе се разгледа на владина седница и понатаму ќе биде проследен во Венецијанската комисија. Она што е важно за овој закон е дека вработувањата ќе бидат врз база на компенетност, квалитет и професионаност. Баланерсот е укинат од страна на Уставниот суд и затоа мотивот беше овој закон да го прават група на уставни експерти. Моделот за правична застапеност ќе биде регуларин со подзаконски акти, но по претходни евентуални забелешки од Венецијанскста комисија – рече Минчев.

Со остра критика против законот се огласи ДУИ. Според партијата на Али Ахмети, законот
има за цел да го замени балансерот – правен и обврзувачки инструмент за одразување на демографската реалност во јавните институции – со нејасна, неефикасна и политички стерилна структура како што е „координативно тело“.

-Ова е обид уставната обврска да се претвори во административна фарса и да се демонтира еден од најважните столбови на Охридскиот договор – правичната и еднаква застапеност на етничките заедници. За Албанците, овој закон е штетен. И нема да запреме сѐ додека балансерот не се врати како единствен правно обврзувачки механизам за гарантирање еднаквост во администрацијата. Замената на прецизниот и транспарентен калкулатор со „годишни извештаи“ и „координативни тела“ кои немаат никаква надлежност да ги обврзат институциите да го почитуваат принципот на застапеност, е самото по себе политички чин што создава неправда и институционална етничка доминација – велат од ДУИ.

Од партијата најавија дека ќе ги искористат сите институционални и демократски механизми за да го блокираат законот.