Организацијата „Загреб прајд“ објави дека за малку повеќе од една година, од јули 2024 година до крајот на август 2025 година, во Загреб и неговата околина се регистрирани најмалку десет случаи на напади врз геј мажи преку нивно намамување преку апликацијата Гриндер.

Тие тврдат дека Загреб е „опустошен од организирани насилни хомофобични банди кои тепаат и ограбуваат геј мажи“, пренесува Индекс.

„Неколку организирани криминални групи, обединети со цел да извршат злосторства од омраза и други кривични дела врз основа на сексуална ориентација, ги мамат геј мажите во стапица лажно претставувајќи се во дигиталниот простор“, велат од организацијата.

Сите случаи евидентирани од „Загреб Прајд“, како и оние пријавени од Загребската полициска управа, имаат ист образец: по пристигнувањето на договореното место за средба, геј маж е нападнат од неколку помлади мажи во заседа, навредуван, а потоа брутално физички нападнат и ограбен.

„Загреб Прајд“ дознава за нападите во стапица директно од жртвите кои се јавуваат во нивната постојана служба за правна поддршка и советување, и од полициските извештаи. Статистички гледано, ова е најголемото зголемување на злосторствата од омраза против геј луѓето во последните десет години“, соопшти Загреб Прајд.

Организацијата бара сите кривични дела извршени од такви криминални групи, кривични дела против имотот, да бидат препознаени и квалификувани како злосторства од омраза.