Фактот дека незадоволството на жителите на големите туристички градови кои се бунат против масовниот туризам се шири низ Европа не влијае многу на компаниите за изнајмување сместување. Интересот за патување нема да престане, може да се пресели само на други, помалку посетени дестинации, а за нив ова значи дополнителен приход и уште повисоки провизии. Како една од водечките компании,  Ер- би- ен- би воведе дополнителна понуда на својата платформа за секој случај – покрај сместувањето, тие започнаа и со промоција на локалните претприемачи- пишува Политика. Корисниците ќе имаат можност да закажат услуги од фризери, фотографи, козметичари… Според американските медиуми, оваа дигитална платформа го проширила својот бизнис за да вклучи услуги како што се организирање посети на музеи, курсеви за готвење, часови по јавање коњи, како и разни други услуги што на секого може да му бидат потребни кога е на туристичка дестинација.

– Хотелите имаат нешто што ние го немаме, а тоа се услугите – рече извршниот директор на Ер- би- ен- би, Брајан Чески.

Понудата првично ќе биде лансирана во 260 градови и во 10 категории, вклучувајќи услуги за коучинг и фотографирање, но бројот на овие услуги само ќе се зголемува со текот на времето. Како што објаснија, ова е радикална промена на апликацијата што досега се користеше само неколку пати годишно, за резервација на сместување. Отсега, таа ќе има поширока намена и ќе им служи на корисниците за сите други услуги. Интересно е што тие ја користат само моменталната популарност на апликацијата, која сè повеќе се отвора за нови претприемачи кои имаат што да понудат. Аналитичарката Каролина Миланези изјави дека овој потег би можел да го промени начинот на кој берзата ја гледа оваа компанија и дека наместо претходните проценки низ призмата на бројот на ноќевања, таа во иднина би можела да добие статус на технолошка платформа. Тие сега, велат експертите, влегуваат во област во која имаат конкуренција, а исто така ќе бидат обврзани да се придржуваат кон поголем број прописи.

Дали оваа платформа се оддалечува од бизнисот што предизвикува големо незадоволство кај локалното население, од издавање сместување, со текот на времето? Веројатно, но се соочува со огромни обврски кога станува збор за услугите. Се поставува прашањето како ќе бидат избрани овие претприемачи и кој ќе биде одговорен за нивната сигурност. Засега, понудата во десет категории услуги е креирана врз основа на анкетите на корисниците. Давателите на услуги аплицираат, а потоа Ер- би- ен- би ги избира врз основа на искуството и прегледите што ги оставиле корисниците. Тие едноставно добро ја проценија деловната можност, пресметувајќи дека за секое евро потрошено за сместување, корисниците издвојуваат уште три за храна, шопинг и екскурзии. Патем, тие веќе објавија дека провизијата за овие услуги ќе биде 20 проценти и дека приходите ќе се користат за покривање на трошоци како што се надоместоци за трансакции на плаќање, поддршка на клиенти и осигурување.

Сите корисници што ја користат оваа платформа ќе забележат дека е редизајнирана и прилагодена на новите понуди. Доколку некој резервира соба преку нив, апликацијата веднаш ќе предложи дополнителни услуги што можеби ќе му бидат потребни. Оваа компанија, патем, се соочи со многу проблеми во претходните години токму поради својата деловна политика што се потпираше на изнајмување сместување. Основана во 2005 година, таа брзо прерасна во сериозна компанија и со години е водечка платформа за краткорочно изнајмување сместување. За време на пандемијата, нивниот промет беше преполовен, но веднаш по завршувањето на оваа здравствена криза, тие се вратија и ги срушија сите рекорди во овој бизнис. Во претходните две години имаше неколку проблеми: првенствено поради изнајмувањето евтино сместување, што ги доведе големите европски туристички центри на работ кога станува збор за опстанокот на локалното население и неговото функционирање во нивните градови. Затоа имаше најави за забрана за работа на овие платформи, кои, како што гледаме, се враќаат со нови идеи и деловни потфати.