Американски офицери оценија дека касетна муниција би можела да им биде од полза на украинските сили во офанзивата за ослободување на територијата што е окупирана од Русите, иако таквото оружје е забрането со меѓународна конвенција. Сепак, ни САД ни Русија ни Украина не се потписници на Конвенцијата за касетна муниција забранува секакво користење, производство, трансфер и чување касетни бомби што при активирање исфрлаат мали експлозивни направи на голема површина. Конвенцијата е на сила од август 2010 година, усвоена е од 123 земји и ратификувана е од 108.

Киев побара од американски конгресмени да ја притиснат администрацијата на претседателот Џо Бајден да одобри испраќање „двонаменска конвенционална подобрена муниција“ (ДПИКМ) на Украина, наспроти ограничувањата во Конгресот и противењето на американските сојузници.

– Нашите воени аналитичари потврдија дека ДПИКМ би била полезна, особено против утврдените руски позиции на бојното поле. Причината поради која не сме испратиле ваков капацитет е поврзана со постојните ограничувања во Конгресот во врска со ваквата муниција и загриженоста за можно нарушување на единството со сојузниците. Од перспектива на бојното поле, веруваме дека би била корисна – изјавила на сослушување пред конгресмени Лаура Купер, заменик-помошничка на секретарот за одбрана.

Украинскиот претседател Володимир Зеленски повеќепати изјави дека офанзивата за враќање на окупираната територија се одвива бавно поради силниот отпор на утврдените руски сили, но и за да се избегнат загуби во човечки животи. За потребите на офанзивата Киев веќе доби огромна воена поддршка од САД – проектилски системи ХИМАРС, противвоздушни „патриот“ и тенкови „абрамс“. Вашингтон во повеќето случаи се противеше на испраќање оружје што може да биде употребено против цели на територијата на Русија, но подоцна ја одобри помошта.
Касетната муниција е забранета, бидејќи вообичаено не се активираат сите мали бомби и тие со години по крајот на војните може да експлодираат и сериозно да повредат цивили.