Мерката за забрана за увоз на српски производи на Косово е на сила точно два месеца и нема индикации кога би можела да биде повлечена и покрај повиците на Европската унија, САД и деловните здруженија.
Одлуката за забрана за влез на камиони со српски регистарски таблички, Владата на Косово ја проследи на царина на 14 јуни, истиот ден кога српската полиција уапси тројца косовски полицајци на територијата на централна Србија. Одлуката набрзо беше изменета и дозволуваше влез на камиони со српски регистарски таблички, но не и проток на српска стока.

Во меѓувреме, на 26 јуни, откако Судот во Краљево го потврди обвинението, косовските полицајци беа ослободени од притвор во Србија и истиот ден се вратија на Косово.

Портпаролот на Владата на Косово, Перпарим Криезиу, минатата недела изјави дека не треба да се брза со укинување на мерките за увоз на стоки од Србија.

„Претходните мерки беа безбедносни мерки, по киднапирањето на тројца косовски полицајци од територијата на нашата држава, на границата со Србија. Безбедносните институции оценија дека е неопходно зголемување на контролата и внимателноста на премините со Србија, анализата на безбедносната состојба е во тек. Утврдено е дека има подобрување на ситуацијата и сакаме што поскоро да се врати во нормала. Оптимисти сме дека подобрената состојба ќе овозможи отстранување на мерките, но нема потреба од брзање“, рече Криезиу.

Според мислењето на економските експерти од Косово, ваквата состојба најмногу ги погодува потрошувачите, а Бојан Станиќ од Секторот за стратегиски анализи на Стопанската комора на Србија вчера изјави дека штетите поради блокадата на увозот на стоки од Србија во Косово се се зголемува, наведувајќи дека сега, кога се во прашање нереализираните пратки, речиси 50 милиони евра.

Како последица на ваквата политика на Владата во Приштина, фондот на лекови во КБЦ Косовска Митровица е при крај, како што истакнаа челниците на оваа институција, нарекувајќи ја состојбата алармантна, додека Србите и од север и од од југот на Косово, укажуваат дека робата што ја има се нуди како замена за поскапите српски производи.